Хайуанаттар бағы жануарларды аман алып қалу үшін қандай ерекше тәсіл тапты?
Итбалықтарға – салқын бассейн, керіктерге – мұз: Bioparco хайуанаттар бағы ыстықпен қалай күресіп жатыр?
Италияны шарпыған төтенше аптап ыстыққа байланысты Римдегі Bioparco хайуанаттар бағы жануарларды салқындату үшін арнайы шаралар қабылдауға көшті. Қазіргі уақытта ел астанасында ауа температурасы 36-37°C-қа жетіп, қауіптің ең жоғары – «қызыл» деңгейі жарияланған.
26 маусым күні хайуанаттар бағындағы керіктерге, сусиырларға (бегемоттарға), тапирлерге, капибараларға, лемурлар мен итбалықтарға мұздатылған жеміс-жидектер, көкөністер, балықтар және арнайы дайындалған мұз берілді. Бұл жануарлардың шөлін қандырып қана қоймай, олардың табиғи белсенділігін сақтауға көмектеседі. Сонымен қатар, ыстыққа төзімсіз жануарлар үшін бассейндердегі су салқындатылып, ішкі вольерлерде климаттық бақылау жүйесі іске қосылған.
Жалпы, Италияның Денсаулық сақтау министрлігі елдің басым бөлігінде ұзаққа созылған аптап ыстыққа байланысты қауіптің ең жоғары деңгейін жариялап үлгерді.
Bioparco хайуанаттар бағының зоологиялық жетекшісі Ицхак Ядидтің айтуынша, қосмекенділердің кейбір түрлері төтенше ыстықтан аман қалуы үшін кондиционерленген баспаналарды немесе суды салқындату жүйелерін қажет етеді. Мысалы, қызып кетпес үшін итбалықтар ұсталатын бассейндердегі судың температурасы 25°C-тан аспауы қатаң қадағаланады.
Хайуанаттар бағы әкімшілігінің мәлімдеуінше, мұндай салқындату шаралары ұзаққа созылған жазғы ыстықтың зардабын азайта отырып, жануарлардың сергек әрі белсенді болуына жағдай жасайды.
Пікірлер
Әзірге пікір жоқ. Алғашқы пікірді қалдырыңыз!
