Ел туризмі: 2 миллион қонақ және 69 миллиард теңге табыс
Шетелдік қонақтардың елде 2,9 миллиард доллар жұмсауы – орасан жетістік.
«Елге кім келеді, сервистің түрі анау...» дегенді жиі естиміз. Бірақ статистика мүлдем басқа нәрсені айтады. Қазақстан өңірдегі туристік картада өз орнын нықтап бекітіп қана қоймай, тұрақты даму жолына түсті. 2025 жылғы өсімнен кейін биыл да бұл оң үрдіс сақталып отыр.
2026 жылдың бірінші тоқсанының қорытындысына көз жүгіртейік. Алғашқы үш айда елдегі қонақүйлер мен демалыс орындары шамамен 2 миллион адамға қызмет көрсеткен. Бұл жай ғана сан емес, бұрын болмаған көрсеткіш. Көрсететін қызмет көлемі 69 миллиард теңгеден асып, өткен жылдың сәйкес кезеңімен салыстырғанда 14 пайызға өсті. Ең бастысы, қызметтердің нақты көлем индексі 104,5 пайызды құрады. Бұл бағаның өсуін ғана емес, адамдардың туристік белсенділігінің нақты артқанын көрсетеді. Демек, ел қымбатшылықтан көп ақша жұмсап жатқан жоқ, шынымен де көп саяхаттап жатыр.
Әсіресе ішкі туризмнің қарқыны ерекше тәнті етеді. Ел ішінде демалған қазақстандықтардың саны 3,6 пайызға артты. Отандастарымыздың шетелдік жағажайларға ғана емес, еліміздің тау мен тасына, көлі мен шөліне қызығушылығы артып келе жатқанын дәлелдейді. Инфрақұрылым біртіндеп жақсарып, қызмет көрсету аясы кеңейген сайын, ішкі туризм саланы дамытудың негізгі драйверіне айналып отыр. Ол өңірлердегі экономикалық белсенділікті ынталандырып, жаңа жұмыс орындарын ашып, шағын және орта бизнесті қолдауға септігін тигізіп жатыр.
Кім қайда барып жатыр дегенге келсек, көш басында, Алматы қаласы тұр (үш айда 473 мыңға жуық адам). Екінші орында - Елорда (352 мың адам), ал үшінші орында – Бурабай мен Зерендісі бар Ақмола облысы (161 мың адам). Бұл ретте курорттық бағыттарға деген қызығушылық өте жоғары. Барлық келушілердің 40 пайызы, яғни 800 мыңнан астам адам нақты курорттық аймақтарға барған.
Сонымен, елдегі туризмді сынай бермей, табыс көзіне айналып келе жатқанын мойындайтын кез жетті. Шетелдік қонақтардың елде 2,9 миллиард доллар жұмсауы – орасан жетістік. Мұндай оң динамика Президент Қасым-Жомарт Тоқаевтың 2025 жылғы Жолдауында айтқан басымдықтарымен, соның ішінде Алматы туристік кластерін дамыту туралы нақты тапсырмаларымен толық сәйкес келеді.
