«Grady-White Boats» иесі 400 миллион долларын неге қайырымдылыққа берді?
Маған зәулім яхтаның да, Жерорта теңізінің де керегі жоқ!» Жарты ғасыр бойы тірнектеп жинаған байлығы мен табысты зауытынан өз еркімен бас тартқан адамның сыры қандай?
Жалғыз мұрагерінен айырылғаннан кейін, «Grady-White Boats» компаниясының қожайыны Эдди Смит өз байлығын кімге қалдырарын көп ойланды. Ақыры әйгілі Patagonia компаниясының ізімен жүріп, келешектегі барлық табысын қайырымдылыққа жұмсауға бел буды - деп жазды nytimes.com сайты.
Сонау 1968 жылы кіші Эдди Смит Солтүстік Каролинадағы жабылудың аз-ақ алдында тұрған қайық шығаратын кішкентай зауытты сатып алады. Бұл өте тәуекелді қадам еді, өйткені «Grady-White Boats» компаниясының жағдайы ол кезде мүшкіл тұғын.
Бірақ Смит мырза жоқтан бар жасап, кәсіпті құрдымнан алып шықты! Қазір бұл жағалау суларына арналған премиум класстағы балық аулау қайықтарын шығаратын, жылына жүздеген миллион доллар табыс әкелетін алпауытқа айналды. Ең қызығы, жарты ғасырдан астам уақыт бойы ол сырттан бірде-бір инвестор тартпай, биржаға акцияларын да шығармай, бүкіл тізгінді тек өз қолында мықтап ұстап келді.
Міне, қазір 83 жасқа келген қария өміріндегі ең үлкен әрі соңғы шешімін қабылдады: ол қалтасына түскелі тұрған 400 миллион доллардан бас тартып, компаниясының келешектегі түсетін бүкіл таза пайдасын қайырымдылыққа аударуға уәде берді.
«Құдай маған бар байлығымның басым бөлігін мұқтаждарға таратып беруге жағдай жасап, үлкен бақ берді», – деді берген сұхбатында. – «Маған ұзындығы 200 фут болатын зәулім яхтаның да, қысты Жерорта теңізінде шалқып өткізудің де еш қажеті жоқ. Мен өзімнің Солтүстік Каролинамда-ақ бақыттымын».
Пікірлер
Әзірге пікір жоқ. Алғашқы пікірді қалдырыңыз!
