Еуроодақта жасанды интеллект өнімдерін таңбалау міндеттелді

Еурокомиссия хабарлағандай, 2 тамыздан бастап Еуропалық Одақта жасанды интеллект көмегімен жасалған контентке міндетті түрде белгі қою талабы күшіне енді. Жаңа ереже – нейрожелілер саласын реттейтін Еуропадағы алғашқы кешенді құжат саналатын «ЖИ туралы заңның» (AI Act) маңызды бір бөлігі.

Ендігі кезекте әзірлеушілер мен ЖИ жүйелерін ұсынушылар мұндай бағдарламалар арқылы жасалған материалдарды көзге көрінетіндей етіп арнайы белгімен көрсетуге тиіс. Бұл талап шынайы адамдарға, нысандар мен орындарға немесе оқиғаларға ұқсайтын суреттерге, аудио және бейнематериалдарға қатысты. Сонымен қатар, қоғам маңызы бар мәселелер бойынша жазылған, бірақ алдын ала тексеруден немесе редакциялық бақылаудан өтпеген мәтіндер де міндетті түрде таңбалануы шарт.

Айта кетерлігі, белгі қою міндеті тек ЖИ жүйелерін жасаушыларға ғана емес, нейрожелі өнімдерін кәсіби немесе коммерциялық мақсатта пайдаланатын барлық қолданушыға жүктеледі. Олардың қатарына түрлі компаниялар, БАҚ редакциялары, кәсіби инфлюенсерлер, сондай-ақ билік органдары мен қоғамдық бірлестіктер кіреді.

Әрине, заңда кейбір ерекшеліктер де қарастырылған. Мәселен, емле тексеру немесе фотосуреттерді өңдеу сияқты тек қосалқы қызмет атқаратын ЖИ жүйелеріне таңба қою міндетті емес. Сондай-ақ, айқын көркемдік, шығармашылық, сатиралық немесе ойдан шығарылған сипаттағы контентке де рұқсат берілген. Мұндай жағдайларда туындыны көруге немесе қабылдауға кедергі келтірмейтін өзге де ескерту тәсілдерін қолдануға әбден болады.

Жаңа тәртіпті бұзғандарға Еуропалық органдар қомақты айыппұл салуға құқылы. Нақтырақ айтсақ, ірі компанияларға 15 миллион еуроға дейін немесе жылдық жаһандық айналымының 3 пайызы көлемінде айыппұл салынуы мүмкін. Ал Еуроодақ мекемелері мен агенттіктері үшін бұл сома 750 мың еуроға дейін жетеді. Шағын және орта бизнес өкілдеріне келер болсақ, оларға салынатын айыппұл көлемі пропорционалдық принципін ескере отырып, жекелей есептеледі.