Бизнес пен халыққа ортақ жеңілдік: Елдегі банктердің бәрі бір QR-кодқа бірікті

19 шілдеден бастап Қазақстанда Банкаралық мобильді төлемдер жүйесі (БМТЖ) ресми түрде іске қосылды. Ұлттық банк сүйіншілеген бұл жаңалық – елдегі қаржылық технологиялар мен цифрландырудың жаңа белесі.

Бұрын әр банктің өз экожүйесі, өз терминалы мен кассада тізіліп тұратын бөлек QR-кодтары болатын. Енді бұл кедергілер толығымен жойылды. Жаңа жүйенің арқасында қазақстандықтар қай банктің қызметін тұтынатынына қарамастан, ортақ QR-код арқылы есеп айырысып, телефон нөмірімен кез келген банкке лезде ақша аудара алады.

Ұлттық банктің ресми мәліметінше, қазіргі таңда мобильді қосымшалары арқылы халыққа қызмет көрсетіп отырған отандық банктердің барлығы бұл жүйеге толық қосылған.

Сонымен, 19 шілдеден бастап бізге қандай мүмкіндіктер қолжетімді?

• Енді телефон нөмірі арқылы басқа банктің клиентіне қас-қағым сәтте ақша жіберуге болады. Реквизит іздеп немесе «картадан картаға» деп әуре болудың қажеті жоқ.

• Сатушы мен тұтынушы екі түрлі банктің клиенті болса да, жалғыз QR-код арқылы тауар мен қызмет ақысын кедергісіз төлей береді.

Өзгеріс, әсіресе, шағын және орта бизнес өкілдері үшін үлкен жеңілдік болмақ. Кәсіпкерлер бұдан былай үстел үстін түрлі банктердің QR-тақтайшаларына толтырып, әр банктен бөлек шот ашып әлек болмайды. Жүйеге қосылған барлық банктің клиенттерінен қолма-қол ақшасыз төлемді қабылдау үшін бір ғана QR-код жеткілікті.

Ең бастысы, жаңа жүйе аясындағы барлық аударым мен төлем тәулік бойы, демалыссыз, нақты уақыт режимінде іркіліссіз жұмыс істейді.

Қысқасы, қаржылық операциялар бұрын-соңды болмаған деңгейде жеңілдеді. Қалтаңыздағы смартфон мен өзіңіз үйренген кез келген банктің қосымшасы болса жеткілікті – ортақ төлем жүйесі қалғанын өзі реттейді.