Батыр қыз Ұлдана Мырзуанның күйеуі екінші рет үйленді: Әлеуметтік желіде пікірталас

Былтыр ғана өзгелерді ажалынан арашалап қаламын деп, өзі қыршын кеткен 23 жастағы фельдшер Ұлдана Мырзуанның қазасы бүкіл қазақ елінің қабырғасын қайыстырған еді. Жап-жас ғұмырдың үзілгеніне, артында аңырап қалған жақындары мен шаңырақ көтергеніне ай толмай жесір қалған күйеу жігіттің қайғысына қалың жұрт ортақтасып, көңіл айтқан болатын. Алайда, арада жыл өтпей жатып бұл қайғылы оқиғаның жалғасы қоғамды мүсіркеуден гөрі, ашу мен ызаға булықтырып отыр. Жалған дүние кімге де болса қатыгез ғой, бірақ соңғы жаңалықтар адамгершілік пен аруақты сыйлаудың да шегі бар екенін көрсеткендей.

Өткен жылдың 8 қарашасында елордадағы тұрғын үйлердің бірінде қаптама құлап, адамдар үйінді астында қалғанда, Ұлдана еш ойланбастан көмекке ұмтылды. Ол зардап шеккен анасы мен баласын аман-есен құтқарып, енді ер адамды алып шығуға талпынған сәтте, тоғызыншы қабаттан құлаған ауыр кондиционер батыр қыздың басына түсті. Жансақтау бөлімінде он күн бойы өліммен арпалысқан өрімдей қыз, өкінішке қарай, өмірмен қош айтысты. Ең жан бататыны — Ұлдананың ақ көйлек киіп, Әділет есімді жігітке тұрмысқа шыққанына сол кезде небәрі бір-ақ ай болған еді.

Енді міне, арада небәрі сегіз-ақ ай өткенде, «қайғыдан қан жұтып отыр» деген сол жігіт дүркіретіп қайта той жасап, көпшіліктің қатаң сынына ұшырады. Әрине, «тірі адам тіршілігін істейді», жас жігіттің өз жолын тауып, отбасын құруына ешкімнің қарсылығы жоқ шығар. Бірақ жұрттың шамына тиген нәрсе мүлде басқа. Әлеуметтік желіде тараған ақпараттарға сенсек, күйеу жігіт марқұм келіншегінің топырағы суымай, тіпті қырқы да шықпай жатып-ақ түрлі бойжеткендерге хат жазып, танысуға асыққан көрінеді.

Бұдан асқан сорақылық жоқ шығар десек, екінші тойдың суреттерін көрген жұрт тағы бір сұмдық детальді байқап қалды. Күйеу жігіт жаңа келіннің жанында дәл баяғы марқұм Ұлданамен отау құрғанда таққан бірдей галстугімен керіліп тұр. Бұл жайт желіде үлкен резонанс тудырып, «жесір қалған жігіттің оқиғасы осымен бітті десек, одан да төмен құлдырауға болады екен ғой» деген ащы пікірлердің қарша борауына түрткі болды.

Қазақта «Өлі риза болмай, тірі байымайды» деген қасиетті сөз бар. Өзгенің өмірі үшін шыбын жанын пида еткен батыр қыздың рухы мына жағдайдан кейін қалай тыншымақ? Қазір желідегі жұрт екіге жарылып, бірі өмірдің жалғасатынын, жігіттің жалғыз қалмауы керектігін айтып түсіністік танытса, басым көпшілігі мұны марқұмның аруағын сыйламау, сезімнің арзандығы деп бағалап жатыр. Қалай десек те, қаралы күндердің ізі суымай жатып жаңа махаббат іздеу мен бұрынғы некеден қалған символикалық затты жаңа тойға тағып бару — көпшіліктің санасына сіңіп, оп-оңай ақтап алуға келер қылық еместей көрінетіні ақиқат.