Бақылаушы емес, құрылтайшы: Еліміз жаһандық ЖИ ережелерін жазуға қатыспақ

Жасанды интеллект адамзатты алмастыра ма деген мәселе қызу талқыланып жатқан тұста, Қазақстан бұл үрдіске стратегиялық тұрғыдан келіп, жасанды интеллект бойынша жаңа халықаралық ұйымның құрылтайшы-мемлекеттерінің қатарына кіруді көздеп отыр деп жазды - Protenge телеграм арнасы.

Үкімет Дүниежүзілік жасанды интеллект ынтымақтастығы ұйымын (WAICO) құру туралы келісім жобасын қоғамдық талқылауға шығарды. Қытайдың бастамасымен құрылатын бұл ұйымның бас пәтері Шанхай қаласында орналасады және еліміз оған құрылу сатысында-ақ қосылуды жоспарлап отыр. Аталған алаң елдердің жасанды интеллектіні дамытуды талқылайтын, технологиялармен алмасатын және оны қауіпсіз пайдаланудың ортақ тәсілдерін іздестіретін басты орталығына айналмақ.

Бұл қадамның еліміз үшін маңызы өте зор, себебі Қазақстан жай ғана бақылаушы мәртебесімен шектелгісі келмейді. Мемлекет ұйымның құрылтайшылары қатарына ену арқылы оның жұмысына ең басынан бастап белсенді қатысуға ниетті. Қазіргі таңда әлем жасанды интеллект саласындағы халықаралық ережелерді енді ғана қалыптастырып жатыр. Бірнеше жылдан кейін дәл осы ережелер технологияларға қол жеткізуге, бірлескен зерттеулер жүргізуге, инвестициялар тартуға және елдер арасындағы цифрлық ынтымақтастыққа тікелей ықпал ететін болады. Бүгінде жасанды интеллект жалаң технология болудан қалып, экономиканың, бәсекеге қабілеттіліктің, тіпті геосаясаттың өзекті мәселесіне айналды. Ірі мемлекеттердің бұл салаға жүздеген миллиард доллар инвестиция құйып, жекелеген халықаралық бастамалар көтеруі де кездейсоқтық емес, сондықтан Қазақстанның бұл жаһандық үрдістің басында болуы стратегиялық тұрғыдан аса маңызды.