Байланыс жоқ жерде де жұмыс істейді: Үндістан нарыққа жаңа спутниктік телефон шығарды
Теңіз түбі мен тау шыңында да байланыс үзілмейді: Төтенше жағдай қызметкерлері мен саяхатшыларға арналған жаңа құрылғы
Үндістанның мемлекеттік BSNL телеком-операторы бағасы 134 166 рупий (салықтарды есепке алғанда шамамен 1400 доллар) болатын жаңа спутниктік телефонды жұртшылыққа ұсынды. Бұл құрылғы қарапайым ұялы байланыс желісі тартпайтын шалғай аймақтарда қолдануға арнайы құрастырылған.
Телефон оны жасап шығаруға тікелей атсалысқан серіктес ұйым – Inmarsat компаниясының спутниктері арқылы байланыспен қамтамасыз етіледі.
Құрылғының басты ерекшеліктері
Жаңа аппарат қиын ауа райы мен ауыр жағдайларда жұмыс істеуге бейімделген, корпусы өте берік. Сондай-ақ, қуаттау көздерінен жырақ жерде ұзақ уақыт сөнбейтін сыйымдылығы жоғары аккумулятормен жабдықталған. Төтенше жағдайлар кезінде дереу көмек шақыруға арналған арнайы SOS батырмасы да қарастырылған.
Бұл аппарат күнделікті қолданыстағы смартфонды алмастыруға арналмаған. Оның негізгі тұтынушылары – армия, төтенше жағдайлар қызметі, теңіз және кен өндіру кәсіпорындары мен ғылыми экспедициялар. Сонымен қатар, елсіз бағыттармен саяхаттайтын туристер мен қажылар үшін де таптырмас құрал болмақ.
Қатаң бақылау мен заң талабы
Айта кетейік, Үндістанда спутниктік телефондарды қолдану қатаң бақылауға алынған. Мұндай құрылғыны сатып алу және пайдалану үшін Телекоммуникация департаментінен алдын ала рұқсат алу қажет. Бұл талапты бұзғандар заң алдында жауап береді. Рұқсатты рәсімдеп, телефонның өзін тек BSNL кеңселері арқылы ғана сатып алуға болады.
Пікірлер
Әзірге пікір жоқ. Алғашқы пікірді қалдырыңыз!
