Авиациядағы жаңа тренд: Жолаушылар неге Starlink желісі бар ұшақтарды іздейді?

Businessinsider.com сайтының хабарлауынша, ешкім ешқашан «сапарыма тағы бір қосымша ұшу қоссам ғой» деп армандаған емес. Алайда Starlink пайда болғалы жағдай түбегейлі өзгергенге ұқсайды.

SpaceX компаниясының сейсенбідегі есеп беру жиынында президент Гвинн Шотвелл коммерциялық әуе компанияларындағы спутниктік ғаламтордың кең таралуына тоқталды.

«Шыны керек, бізбен жұмыс істейтін әуе компанияларының бірі жолаушылардың төте ұшатын рейстерден бас тартып, тек Starlink қосылған ұшақтарға міну үшін ауысыммен ұшуды таңдап жатқанын таңданыспен жеткізді. Олар авиация тарихында мұндайды бірінші рет көріп отыр», — деді Шотвелл.

Танымал ютубер MrBeast те осы жылдың басында «The Good Guys» подкастында тура осындай пікір білдірген. Ол үшін ұшақта Starlink ғаламторының болуы өте маңызды, сол үшін тіпті қосымша транзиттік рейстермен ұшуға да дайын екенін айтқан.

Ол сондай-ақ Delta Air Lines ұшақтарында жиі берілетін танымал Biscoff печеньесінен гөрі жылдам ғаламторды артық көретінін айтып қалжыңдады. Айта кетейік, Delta әзірге SpaceX-пен келісімшартқа отырмаған.

Осы орайда басылым тілшілері Starlink қызметін қолданатын он үш әуе компаниясына хабарласып, жолаушылардың шынымен де ғаламтор үшін бағыттарын өзгертіп жатқанын немесе өзгертпегенін сұрап білген.

P/S: Қазақстан әуекомпаниялары қашан қондырар екен?!