Astana Hub пен MOST Holding Орталық Еуразияның инвестициялық экожүйесін дамыту туралы меморандумға қол қойды

Бұл серіктестік аймақтың инвестициялық экожүйесін нығайтуға, сондай-ақ Қазақстан мен Орталық Еуразияға ұзақ мерзімді инвестиция тартуға бағытталған.

Құжатқа Astana Hub бас директоры Мағжан Мәдиев пен MOST Holding бас директоры Павел Коктышев қол қойды.

Central Eurasian Capital Bridge — Орталық Еуразияның инвестициялық мүмкіндіктерін кеңейтіп, оны жаһандық экономикалық кеңістікке кіріктіру мақсатында құрылған халықаралық бағдарлама. Ол аймақтық инвестициялық қорларды басқарушы командалардың, халықаралық инвесторлар мен институционалдық серіктестердің басын қосады. Бағдарлама компаниялардың өсуіне, кәсіпкерлік жобалардың ауқымын кеңейтуге және халықаралық әріптестікті дамытуға қолайлы орта қалыптастырады.

«Капитал мен халықаралық сараптамаға қолжетімділік технологиялық компаниялардың өсуіне және жаңа нарықтарға шығуына тікелей ықпал етеді. Central Eurasian Capital Bridge Орталық Еуразияның инвестициялық командалары мен жаһандық инвесторлар қауымдастығының басын қосып, капитал тартуға және халықаралық серіктестік орнатуға жаңа мүмкіндіктер туғызады. MOST Holding-пен бірлесе отырып, біз өңірлік қорларға шетелдік әріптестер табуға, ал компанияларға бизнесін кеңейту үшін қажетті инвестиция тартуға көмектесетін тұрақты инвестициялық инфрақұрылым құрғымыз келеді. Бұл — Қазақстанның Орталық Еуразияға апаратын негізгі инвестициялық әрі технологиялық хаб ретіндегі рөлін нығайтуға таптырмас мүмкіндік», — деді Astana Hub бас директоры Мағжан Мадиев.

Бағдарлама аясында қор басқарушыларын іріктеу және дайындау, сондай-ақ венчурлік капитал мен инвестиция саласының жетекші әлемдік сарапшыларының қатысуымен арнайы оқыту қарастырылған. Қатысушылар негізгі халықаралық конференциялар мен инвестициялық алаңдарға қатысу арқылы кәсіби байланыстарын кеңейте алады.

Бағдарламаның дербес бағыты — институционалдық инвесторлармен, қорлар қорларымен, отбасылық инвестициялық кеңселермен және стратегиялық инвесторлармен кездесулер өткізу. Бұған қоса, бірлескен инвестиция тарту мүмкіндіктерін дамыту және аймақтың инвестициялық әлеуетін халықаралық деңгейде таныту көзделген.

«Central Eurasian Capital Bridge бағдарламасы Орталық Еуразияның қор басқарушылары мен жаһандық инвестициялық қауымдастық арасында ұзақ мерзімді байланыс орнатуға арналған. Бағдарлама командаларды даярлауды, халықаралық сарапшылармен тәжірибе алмасуды және әлеуетті инвесторлармен тікелей диалог құруды біріктіреді. Біз Astana Hub-пен серіктестікте өңірлік қатысушыларға халықаралық әріптестікті дамытуға және компаниялардың өсуіне капитал тартуға көмектесетін тиімді алаң құруды көздейміз», — деп атап өтті MOST Holding бас директоры Павел Коктышев.

Меморандум аясында MOST Holding пен Astana Hub бірлесіп, Central Eurasian Capital Bridge бастамасын тұрақты жұмыс істейтін халықаралық платформа ретінде дамытуға ниетті. Әріптестік өңірлік инвестициялық командалардың беделін нығайтуға, олардың озық білім мен капиталға қолжетімділігін арттыруға және жаһандық инвестициялық экожүйемен берік байланыс орнатуға бағытталады.