Apple Pay Үндістанның 1,4 миллиард халқы үшін төлем жүйесі іске қосады

Apple төрт жылға созылған үзілістен кейін Үндістан нарығындағы қатаң талаптарға көніп, несиелік және дебеттік карталар арқылы төлем қабылдауды қайта бастамақ деп жазды - appleinsider.com сайты.

Технологиялық алпауыттың аталған елде көптен күткен Apple Pay қызметін іске қосу жоспары осындай стратегиялық шегініс жасауға мәжбүрлеп отыр. Естеріңізге сала кетейік, 2022 жылдың маусымында Үндістанның Орталық банкі онлайн төлемдерге қатысты жаңа ережелер бекіткен болатын. Заңнамаға сәйкес, жазылымдар сияқты мерзімді төлемдер үшін банктер тұтынушыны жиырма төрт сағат бұрын ескертіп, карта деректерін сақтаудың орнына арнайы шифрланған токендерді қолдануға міндеттелді. Сонымен қатар әр транзакция Aadhaar жергілікті биометриялық жүйесі арқылы расталуы тиіс еді. Мұндай күрделі өзгерістерге жүйесін бейімдегісі келмеген Apple сол уақытта картамен төлем қабылдаудан толықтай бас тартып, қолданушыларды жергілікті UPI жүйесіне ауысуға үндеген болатын.

Алайда нарықтың өз заңдылықтары бар. Қазіргі таңда корпорация шектеулі пайдаланушылар тобымен карталық төлемдерді қайта тестілеуден өткізіп жатыр, алдағы айларда жаңа мүмкіндік бүкіл Үндістан аумағында қолжетімді болмақ. Инсайдерлік мәліметтерге сүйенсек, төлем жүйесін қайтарудың астарында 2026 жылдың ортасына қарай Apple Pay-ді ресми түрде іске қосу мақсаты жатыр. Технологиялық алыптың Үндістан Орталық банкінің талаптарына мойынсынуының басты себебі – елдің орасан зор экономикалық әлеуеті. Бір миллиард төрт жүз миллионға жуық халқы бар мемлекетте 2024 жылғы мәлімет бойынша Apple смартфондарының нарықтағы үлесі небәрі алты пайызды ғана құраған. Осындай ауқымды өсім перспективасын жіберіп алмау және жаңа тұтынушыларды тарту мақсатында компания басшылығы жергілікті заңнамаға толықтай бағынуды ең ұтымды шешім деп тапты. Осылайша әлемдік нарықта көбіне өз шарттарын қойып үйренген Apple Үндістан билігінің талаптарына келісуге мәжбүр болды, алайда уақытша шегініс болашақтағы үлкен коммерциялық табыстың кепіліне айналуы әбден мүмкін.