Apple мен OpenAI арасында үлкен сот дауы басталды

Жасанды интеллект нарығында үлкен дау басталды. Apple корпорациясы ChatGPT чат-ботын жасап шығарған OpenAI компаниясын және оның қызметкерлерін коммерциялық құпияны ұрлады деп айыптап, сотқа берді.

Жұма, 10 шілде күні Калифорнияның солтүстік округіндегі федералды сотқа түскен шағымда OpenAI-дың Apple-дің бұрынғы мамандарын жұмысқа тарту арқылы жабық деректерге қол жеткізгені айтылады. Талапкердің мәліметінше, жауапкерлер жаңа өнімдер мен жобаларға қатысты құпия материалдарды жүйелі түрде иемденіп келген. Сот құжатында қатардағы техникалық мамандардан бастап, аппараттық қамтамасыз ету бөлімінің басшысына дейін осы іске қатысы бар екені, сондай-ақ әлі жарыққа шықпаған технологиялар мен өндірістік процестер туралы ақпараттың қолды болғанына нақты дәлелдер ұсынылған.

Даудың басы - Дайрабайдың көк сиыры. Бұл дауда басты назар OpenAI-дың аппараттық бөлімшесі саналатын io Products компаниясына ауып отыр. Оның негізін Apple-дің бұрынғы бас дизайнері Джони Айв қалаған. Сонымен қатар, іс материалдарында Тан Ю Тань және Чан Лю есімді тағы екі бұрынғы қызметкердің аты аталады. Жалпы алғанда, қазіргі таңда OpenAI қатарында Apple-ден кеткен 400-ге жуық адам жұмыс істейді екен. Алайда, OpenAI бұл айыптауларды үзілді-кесілді жоққа шығарып отыр. Компания өкілі Дрю Пусатери ВВС-ге берген сұхбатында басқалардың коммерциялық құпиясы оларды мүлдем қызықтырмайтынын, басты мақсаттары – әлемдегі барша адамның мүмкіндігін арттыратын инновациялық технологиялар жасау екенін мәлімдеді. Сарапшылардың айтуынша, бұл сот процесі OpenAI-дың акцияларын биржаға шығару (IPO) жоспарына айтарлықтай кедергі келтіруі мүмкін. Қазір жасанды интеллектіні дамытуға күш салып жатқан компания болашақта Apple-дің басты табыс көзі саналатын тұрмыстық электроника нарығына да шығуды көздеп отыр.