Әлемдік алпауыттар қазақстандық жасанды интеллектке неге құмар?

Қазақстаннан бастау алып, бүгінде Кремний алқабында табысты жұмыс істеп жатқан Nace.AI жасанды интеллект стартабы тағы бір ірі жетістікке жетті. Отандық технологиялық компанияның инвесторлар қатарына әлемге әйгілі Yahoo! компаниясының негізін қалаушы, Alibaba директорлар кеңесінің мүшесі әрі Кремний алқабындағы ең ықпалды кәсіпкерлердің бірі Джерри Янг қосылды. Бұл – жас компания үшін ғана емес, жалпы Қазақстанда жасалған IT-шешімдердің жаһандық нарықта бәсекеге қабілетті екенін көрсететін тарихи қадам.

«Ол сұрағанымыздан да көп ақша бермек болды»

Стартаптың негізін қалаушы әрі бас директоры Дос Бақытжан атақты инвестормен өткен кездесудің жай-жапсарын айтты. Айтуынша, Джерри Янг компанияға инвестиция салу туралы шешімді алғашқы кездесудің өзінде-ақ қабылдаған.

«Кездесуіміз шамамен екі сағатқа созылды. Оның бір сағатында компаниямыздың стратегиясын, технологиялық бағытымызды және неліктен дәл осы тәсілді таңдағанымызды таныстырдым. Джерри техникалық білімі өте жоғары адам екен. Ол өніміміз, нарық, бәсекелестер мен технологиямыздың қалай жұмыс істейтіні жөнінде терең сұрақтар қойды. Әсіресе біздің әмбебап ірі модельдердің орнына шағын, салалық AI-модельдерге басымдық беретінімізге ерекше қызығушылық танытты», - дейді Дос Бақытжан.

Кездесу қорытындысы бойынша Джерри Янг Nace.AI жобасына бірден қаржы құюға дайын екенін білдірген. Тіпті, жоспарланған сомадан әлдеқайда көп қаражат ұсынған көрінеді.

«Шын мәнінде, алғашқы кездесудің өзінде-ақ нақты инвестициялық міндеттеме берілді. Алайда біз компанияның осы кезеңдегі қажеттігіне сай көлемді ғана алдық. Себебі басқа инвесторларға да орын қалдырып, үлестердің шамадан тыс болуына жол бергіміз келмеді», - деп түсіндірді стартап басшысы.

Nace.AI неліктен инвесторлар үшін тартымды?

Джерри Янгке компанияның жеке AI-модельдерін дамыту тәсілі мен таза B2B (корпоративтік сектор) бағытына негізделген стратегиясы ерекше ұнаған.

Nace.AI ұйымдарға бизнес-процестері мен деректерін нақты уақыт режимінде талдауға мүмкіндік беретін құралдар жасайды. Компанияның шешімдері аудитті, қаржылық талдауды және ірі корпоративтік деректер қорымен жұмысты толықтай автоматтандыруға пайдалы. Мұның арқасында компаниялардағы қолмен атқарылатын жұмыс көлемі күрт азайып, стратегиялық шешім қабылдау үдерісі еселеп жеделдейді.

Қазіргі таңда Астана мен Кремний алқабында орналасқан стартап кеңселерінде 30-ға жуық білікті маман еңбек етуде және команда үздіксіз кеңейіп келеді.

Естеріңізге сала кетейік, бұған дейін Nace.AI халықаралық инвесторлардан 21,5 миллион АҚШ доллары көлемінде инвестиция тартқаны, ал бұл ірі мәміленің небәрі 36 сағаттың ішінде аяқталғаны хабарланған болатын. Бүгінде қазақстандық стартаптың клиенттері қатарында әлемнің ірі трансұлттық компаниялары, соның ішінде қаржы саласындағы халықаралық «Үлкен төрттік» (Big Four) өкілдері де бар. Отандық өнімнің осындай алып инвесторлардың назарын аударуы – жобаның дұрыс бағытта келе жатқанының айқын дәлелі.