6654 әскери бөлімінің кинологтары жаңа сақшы иттерді қалай дайындайды?
Бірі есірткі іздейді, екіншісі қылмыскерді ұстайды: Ұлттық ұлан кинологтарының басшылығымен небәрі бір жылда 120 күрделі операцияны сәтті аяқтаған сақшы иттердің адам нанғысыз ерлігі
Кейінгі екі жылдың бедерінде ҚР Ішкі істер министрлігі Ұлттық ұланына қарасты 6654 әскери бөлімінің Кинология орталығы 60 қызметтік күшікті өсірген. Жақын күндері осы төрт аяқты сақшылардың басым бөлігі құқықтық тәртіп әскерінің қатарын толықтырып, нағыз жауынгерлік міндеттерді атқаруға кіріспек.
Алатау қаласында орналасқан Кинология орталығы – Ұлттық ұлан жүйесіндегі кинолог мамандарды шыңдап, қызметтік иттерді баптайтын нағыз бірегей мекеме. Қазір мұнда неміс, бельгия және голланд овчаркалары арнайы күтімге алынған. Айта кетейік, дәл осы орталықта өткен жылы алғаш рет голланд овчаркасынан төл алынып, қызметтік ит тұқымдарының қатарын көбейтуге зор мүмкіндік туды.
Болашақ сақшылар өмірінің алғашқы айларынан бастап-ақ қатаң іріктеуден өтеді. Олардың мінез-құлқы, белсенділігі мен жұмысқа деген бейімділігі жіті назарда болады. Алты ай толған шақта мамандар әр күшіктің нақты бағытын айқындайды: бірі есірткі ізіне түсуге машықтанса, екіншісі жарылғыш заттарды іздеуге, ал үшіншісі патрульдік-іздестіру қызметі мен қауіпті қылмыскерлерді құрықтауға арнайы оқытылады.
Осылайша шыңдалған қызметтік иттер күн сайын Ұлттық ұлан әскери қызметшілерімен тізе қоса отырып қоғамдық тәртіпті күзетеді. Бұқаралық іс-шараларда қауіпсіздік күзетінде тұрып, тыйым салынған қару-жарақ пен заттарды, сондай-ақ хабар-ошарсыз жоғалған адамдарды табуға тікелей атсалысады.
Тек 2025 жылдың өзінде Ұлттық ұлан кинологтары 3500-ден астам қызметтік тапсырманы орындаса, оның 120-дан астамы мінсіз әрі нәтижелі аяқталды. Осы ақылды иттердің көмегімен қылмыс жасады деген күдікке ілінген 81 құқық бұзушы құрықталып, 210 келіден астам өсімдік және синтетикалық есірткі заттары тәркіленді. Сонымен қатар, 14 суық қару, 7 атыс қаруы табылып, хабар-ошарсыз кеткен 17 адамның жүрген жері анықталды.
Орталықта өсірілген әрбір күшік – болашақта әскери қызметшінің ең сенімді төрт аяқты серігі. Олардың сапалы дайындығы мен қырағылығы еліміздің тыныштығын сақтап, азаматтардың қауіпсіздігін қамтамасыз етуге және қызметтік-жауынгерлік міндеттердің мінсіз орындалуына тікелей ықпал ететіні сөзсіз.
Пікірлер
Әзірге пікір жоқ. Алғашқы пікірді қалдырыңыз!
