37 жылдық тарихы бар неміс компаниясы банкротқа ұшырады
Алты апталық тоқыраудың ақыры: Хакерлер бір ғана шабуылмен 37 жылдық бизнесті қалай құртып жіберді?
Баварияда орналасқан кәсіпорын автомобиль жасау, арнайы киім және техникалық маталар өндірісі саласындағы тұтынушыларға тоқыма өнімдерін өңдеу қызметтерін көрсетеді.
Клиент пен жеткізушілерге жолдаған хабарламасында ұйым банкроттық жарияламас бұрын барлық мүмкін амалдарды қарастырып, тығырықтан шығуға тырысқанын жеткізді. Компанияның басқарушы директоры Йоханнес Ценглайн бұл қадамды «кәсіпорынның 37 жылдық тарихындағы ең ауыр шешім» деп атады.
«Алайда, 2026 жылдың 29 наурызында болған кибершабуыл компаниямызға орасан зор нұқсан келтірді. Қанша тырыссақ та, оның орнын толтыра алмадық. Шабуылдың салдарынан өндіріс алты аптаға жуық уақытқа тоқтап, ауыр қаржылық қиындықтар туындады. Ақырында бұл жағдай қаржылық жағдайымызды әбден тұралатып, банкроттық туралы арыз жазудан басқа амалымыз қалмады», – деп жазды Ценглайн.
ZEGO компаниясы шабуылдың егжей-тегжейін жария етпеді: бопсалаушы вирус (шифрлағыш) қолданылғаны, қылмыстың артында кім тұрғаны және клиенттер мен қызметкерлердің деректері ұрланған-ұрланбағаны белгісіз. Дегенмен, компания бір нәрсені ашық айтты: бизнестің құрдымға кетуі үшін тек жұмыс процесінің бірнеше аптаға бұзылуы жеткілікті болды. ZEGO банкроттық рәсімі басталғанын, бірақ бұл кәсіпорын біржола жабылады деген сөз емес екенін атап өтті. Сырттан тағайындалған басқарушылар бизнесті қайта құрылымдап, жұмыс орындарын сақтап қалуға тырысқанша, өндіріс тоқтамайды.
Бірінші рет емес...
Бұған дейін 158 жылдық тарихы бар британиялық «Knights of Old» көлік компаниясы да бопсалаушы бағдарлама шабуылынан кейін өз жұмысын тоқтатқан болатын. Қылмыскерлер қызметкердің құпия сөзі арқылы желіге кіріп, жүйені бұғаттап тастағандықтан, 700-ден астам адам жұмыссыз қалды. Олардың талап еткен ақшасын төлегеннің өзінде жағдай оңалмаған.
Өткен жылы телефон жөндейтін тағы бір неміс фирмасы кибершабуыл зардабынан жабылып қалғанын мәлімдеді. Жүйені қалпына келтіру мен тұтынушылардың сенімін қайтару өте көп қаражатты талап еткендіктен, кәсіпорын шығынды көтере алмаған.
Ал 2025 жылы Солтүстік Америкадағы ең ірі азық-түлік дистрибьюторы «United Natural Foods» хакерлердің шабуылына ұшырап, өнім жеткізу және клиенттерге қызмет көрсету процестері бұзылған еді. Сол кезде компания бұл оқиға жыл қорытындысы бойынша қаржылық көрсеткіштерге айтарлықтай кері әсер ететінін мәлімдеген болатын.
Пікірлер
Әзірге пікір жоқ. Алғашқы пікірді қалдырыңыз!
